1435 г. — Договорная грамота Великого Новгорода с великим князем Василием Васильевичем о мире

По благословению преподобнаго священноинока Еуфимья, от посадника ноугородьскаго Михаила Ивановичя, от тысяцкаго новьгородского Ананьи Васильевичя, и от всего Великого Новагорода.

Се приехали послове к великому князю Василью Васильевичю всея Руси от Великого Новагорода посадник Офонас Федоровичь и посадник степенный Михаила Онаньич, от черных людеи Козма Тарасьин и Михаило Семенов, докончали мир по старым грамотам крестным с князем великим с Васильем Васильевичем всея Руси. Как целовал князь великы Андреи, князь великыи Иван, князь великыи Семен, и прадед твои князь великыи Иван, и дед твои князь великыи Дмитрии, и отец твои князь великыи Василеи, целуи, господине князь великыи, по тому же крест к всему Великому Новугороду. Нов ти город держати по старине, без обиды; а нам, мужем ноугородцем, княжение твое великое держати чесно и грозно, без обиды. А пошлин твоих великого князя не таити, по целованью. А что волостеи ноугородскых всех, ти не держати своими мужми, а держати ти мужми ноугородскыми; а дар имати от тех волостеи. А без посадника ти, княже, суда не судити, ни волостеи роздавати, ни грамот давати. А что ти, княже, пошлина в Торжьку и на Волоце: тивуни свои держати на своеи части, а наугородцем на своеи части. А в Бежицах тебе, князю великому, и твоеи княгыне, и бояром, и слугам твоим сел не держати, ни купити, ни даром не приимати, по всеи волости по Новьгородскои. А се ти, княже, иволости ноугородскые: Волок с всеми волостьми, Торжек, Бежици, Городець Полець, Шипино, Мелеча, Егна, Заволочье, Тир,Пермь, Печера, Югра, Вологда. А в Русу ти, княже, ездити на третью зиму. А летети, княже, ездить на Вьзвад зверь гонити ти. А в Ладогу ти слать осетреникы и медовары, и по старым грамотам. А в Ладогу ти, княже, ездити на третье лето. А из Бежиц ти, княже, людеи не выводити в свою волость, ни из ыных волостеи ноугородскых, ни грамот им давати, закладников не приимати ни твоеи княгине, ни твоим бояром: ни смерда, ни купчины. А без вины ти, княже, мужа волости не лишити. А грамот не посужати. А пожни, княже, что твои и твоих мужеи то твои и твоих мужеи; а что пожни новгородскые, то к Новугороду, как пошло. А дворяном твоим, как пошло, погон имать: ото князя по пяти кун, а от тивуна по две куны. А что ти, княже, мытъ по Суждалскои земли, в твоеи волости: от воза имати по две векше, и от лодьи, и от хмелева короба, и ото лняна. А дворяном твоим у купцев повоза не имати, разве ратные вести. А слобод и сел съступился. А на Ноугородской земли волостеи не ставити. А на Имоволожском погосте куны имати. А холоп или роба иметь на господу вадити, а тому ти веры не яти. А на Низу ти, княже, новьгородца не судити, ни дани раздавати, ни приставов не всылати в всю Ноугородскую волость. А что, княже, гнев будет на владыку, или на посадника и на весь на Великыи Новъгород, то ти, княже, нелюбие отложити. А про Дмитрея про Тарасова не мщатись, ни судом, ни чим же. А кто почнет вадити, тому ти веры не яти. А про послы, княже, и про купци про ноугородскые по твоеи земли, тех ти не приимати. А в Немецком ти дворе торговати нашею братьею, а двора ти не затворити, ни приставов не приставливати. На том ти, княже, крест целовати к всему Новугороду. А гостем гостити без рубежа, по цесареве грамоте. А судии ти слати по волостем на Петров день, как пошло. А вывода межи Суздальской земли и Ноугородской не чинити. А закладнеи ти, княже, ни твоеи княгине, ни твоим бояром в Торжьку не держати, ни по всеи Ноугородской волости: а купец поидет в сто, а смерд потянет в свои погост, как пошло в Новегороде. На том на всем, княже, крест целуй к всему Великому Новугороду по любви и в правду, без всякого извета; такъже и посадникы, и тысяцкые, и весь Великыи Новъгород, на сем же целуйте крест к великому князю Василью Васильевичю всеи Руси, по любви, в правду, без хитрости.

Список конца XVI в. ГИМ, собр. Уварова, № 512

Поделиться: