1371 г — Договорная грамота Новгорода с тверским великим князем Михаилом Александровичем

Поклон от посадника, и от тысячьского, и от всих стареиших, и от всих менших, и от всего Новагорода к господину князю великому Михаилу.

На сем, господине, Новгород всь крест целует. Княжение твое честно держати по пошлине, без обиды; а тобе, господине, такоже Новгород держати по пошлине без обиды. Что слобод Дмитриевых и Андреевых, что селца тягнуло к тым слободам, того всего тобе съступатися, то все к Новугороду бес кун. А что, княже, сел твоих, и владычних, и княгыниных, и бояр твоих, и слуг твоих на Новгородьскои земли: которое село зашло бес кун, то бес кун поидет к Новугороду; а кто купил, а тыи знает своего истьца или детей его; истца ли не будет, ни детеи его, целовати ему крест, како то истца не ведает, взяти ему куны, колко будет дал, по исправе, а земля к Новугороду. А рубежь ти, княже, межю Суждальскую землю и Новгородьскою дати ти старыи, како было при деде твоем и при праотце твоем Ярославе. А што волостии новгородьскых, тех волостии тобе не держати, княже, своими мужи, держати мужи новгородьскыми; а дар тобе имати от тех волостии. А бес посадника ти, княже, суда не судити, ни волости роздавати, ни грамот давати. А без вины мужа волости не лишити. А в Русу, княже, ездити в осень, како пошло. А лете ездети на Възвад звери гонить. А за Волок ти слати своего мужа из Новагорода в дву насаду, по пошлине, а опять ехати туды же на Новгород, а с Низу ти не слати; такоже и в Бежице. А что пошлины, княже, в Новгородьскои волости, того вы мене не таити в всих волостех. А холоп или поручникы выдавати. А всему тому суд в Новегороде. А што ти, княже, пошло в Торжьку и на Волоце: тиун свои держати на свои части, а новгородьча на своеи части. А в Бежицах тобе, княже, ни твоеи княгине, ни твоим боярам, ни твоим слугам сел не дьржати, ни купити, ни даром приимати, ни по всеи волости Новгородьскои. А се, княже, волости новгородьскыи: Волок с всими волостьми, Торжок, Бежице, Палець Городець, Мелеца, Шипино, Егна, Заволочье, Терь, Пермь, Печера, Югра, Вологда. А свиньи ти бити за 60 вьрст от города. А в Ладогу ти слати, княже, осетреника своего и медовара по грамоте прадеда твоего Ярослава. А ездети тобе, княже, в Ладогу на третьее лето. А из Бежиць, княже, людии в свою волость не выводити, ни из иных волостии новгородьскых, ни грамот давати, ни закладников приимати ни княгини твоеи, ни боярам твоим, ни слугам твоим: ни смерда ни купцины. А грамот ти не посужати. А што пожни твои и твоих муж, то твое и твоих муж; а новгородьскыи Новугороду. А дворянам твоим, како пошло, погон имати: от князя по пяти кун, а от тиуна по две долгеи. А што, княже, мыто по Суждальскои земли и в твоеи волости: от воза по две векше, от лодьи, от хмелна короба и от лняна. А дворянам твоим у купец повозов не имати, разве ратнои вести. А свобод и мытов на Новгородьскои волости не ставити. А холоп или роба почнеть вадити на господу, тому ти веры не яти. А на Низу тобе, княже, новгородча не судити, ни волостии роздавати. А кто почнеть вадити к тобе, тому ти веры не яти. А в Немечькомъ дворе тобе, княже, торговати нашею братьею; а двора ти не затваряти; а приставов не приставливати. А гости нашему гостити межю Суждальскою землею без рубежа, по цесареве грамоте. А судьи слати тобе свои на Петров день, тако пошло. А вывода ти, княже, межю Суждальскою землею и Новгородьскою не чинити. А што закладне твои в Торжьку или инде где, или за тобою, или за твоею княгинею, или за мужи твоими: кто купец, поидет в свое сто. А коли будет Новугороду розмирье с Немчи или с Литвою или с ыное стороне, пособляти ти, княже, по Новегороде бес хытрости. А без новгородьского ти слова, княже, воины не замышляти. А приставов ти с Низу в всю в Новгородьскую волость не всылати. А кто купец, поидет в свое сто, а смерд поидет в свои погост; тако пошло в Новегороде, отпусти их проче. А гнева ти, княже, до Новагорода не держати ни до единого человека. А ряду, княже, в Новгородьскои волости тобе и твоим судьям не посужати. А самосуда не замышляти. А старосте ни холопа, ни робы без осподаря не судити твоим судьям. А за рубеж из Новгородьскои волости твоим дворяном суда не выводити, ни судити. А свобод ти и сел съступитися. А на сем на всем князь великыи крест человал. А что ти грамот крестных Новугороду с всими городы с немечкыми, на те ти грамоты, княже, не наступатися, а новгородьскои ти души блюсти. А вынесут тобе из Орды княжение великое, нам еси князь великыи; или пак не вынесут тобе княжения великого из Орды, поити твоим наместникам из Новагорода проц и из новгородьскых пригородов, а в том Новугороду измены нету.

РГАДА ф. 135. древлехранилище

Поделиться: