1307—1308 гг — Договорные грамоты Новгорода с тверским великим князем Михаилом Ярославичем

Грамота тверская

Благословление от владыце, поклон от посадника, и от тысячкого, и от всех стареишиих, и от всех меншиих, и от всего Новагорода господину князю великому Михаилу.

На семь, господине, Новгород все хрест целует. Княжение твое честьно держяти по пошлине, без обиды; а тобе, господине, такоже держяти Новъгород по пошлине, без обиды. Что свобод Дмитриевых и Андреевых, и что сельц тягнуло к тым свободам, того всего тобе съступитися, то все к Новугороду бес кун. А что, княже, сел твоих, и владычьних, и княгыниных, и бояр твоих, и слуг твоих на Новгородьскои земли: которое село зашло бес кун, то бес кун поидеть к Новугороду; а кто купил, а тыи знает своего истьца или дети его; истьца ли не будет ни детии его, целовати ему хрест, како истеча не сведаеть, взяти ему куны, колико будеть дал, по исправе, а земля к Новугороду. А рубежь ти, княже, межю Суждальскою землею и Новгородьскою дати ти старыи, како было при деде твоем и при отци твоем Ярославе. А что волостьи новгородьскыих, тех волостьи тоб не держати, княже, своими мужи, держати мужи новгородьскыми; а дар тобе имати от тех волостьи. А бес посадника ти, княже, суда не судити, ни волостьи роздавати, ни грамот давати. А без вины мужя волости не лишити. А в Русу ездити, княже, в осень, како пошло. А лете ездити на Озвад зверии гонит. А за Волок ти слати своего мужя из Новагорода в дву носаду, по пошлине; а опять ехати туды же на Новъгород, а с Низу ти не слати; такоже и в Бежице. А что пошлин князю в Новгородьскои волости, того вы мене не таити в всех волостех. А холопы и поручникы выдавати. А всему тому суд в Новегороде. А что ти, княже, пошло, на Тържьку и на Волоце: тиун свои держяти на своеи части, а новгородца на своеи части. А в Бежицах тобе, княже, ни твоеи княгыни, ни твоим бояром, ни твоим слугам сел не держати, ни купити, ни даром приимати, ни по всей волости Новгородьскои, А се, княже, волости новгородьскыи: Волок с всеми волостьми, Тержьк, Бежице, Палиц Городец, Мелеча, Шипино, Егна, Заволочие, Тер, Пермь, Печера, Югра, Вологда. А свинии ти бити за 60 верст от города. А в Ладогу ти, княже, слати осетрьника и медовара по грамоте деда твоего Ярослава. А ездити тобе, княже, в Ладогу на 3-е лето. А из Бежиц, княже, людьи не выводити в свою волость, ни з иных волостьи новгородьскыих, ни грамот им давати, ни закладнев приимати ни княгыни твоеи, ни бояром твоим, ни слугам твоим: ни смерда, ни купчины. А грамот ти не посужати. А пожне, что твои и твоих муж пошло, то твое и твоих муж; а новгородьское Новугороду. А дворяном твоим, како пошло, погон имати: от князя по 5 кун, а от тиуна по две делгеи. А что, княже, мыт по Суждальскои земли и в твоеи волости: от воза имати по две векше, и от лодии, и от хмелна короба, и от лняня. А дворяном твоим у купец повозов не имати, разве ратнои вести. А свобод ти и мытов на Новгородьскои волости не ставити. А холоп или роба почнет вадити на господу, тому ти веры не яти. А на Низу тобе, княже, новгородчя не судити, ни волости роздавати. А кто почнет вадити к тобе, тому ти веры не яти. А в Немечком дворе тобе, княже, торговати нашею братиею; а двора не затворяти; а приставов не приставливати. А гости нашему гостити межи Суждальскою землею без рубежя, по цесареве грамоте. А судие слати тобе свое на Петров день, тако пошло. А вывода ти, княже, межи Суждальскою землею и Новгородьскою не чинити. А что закладников в Тержьку или инде, или за тобою, или за княгынею, или за мужи твоими: кто купец, поидет в свое сто; а смерд поидет в свои погост; тако пошло в Новегороде, отпусти их прочь. А гнева ти, княже, до Новагорода не держяти ни до одиного человека. А ряду в Новгородьскои волости тобе, княже, и твоим судиям не посужяти. А самосуда не замышляти. А старосте ни холопа ни робы без господаря твоим судиям не судити. А за рубеж из Новгородьскои волости твоим дворяном суда не водити, ни судити. А свобод ти и сел съступитися.

РГАДА ф. 135. древлехранилище

Поделиться: